Greiningarpróf

Orðaskil-málþroskapróf

Prófið byggir á orðaforðagátlista fyrir börn á aldrinum eins og hálfs til þriggja ára. Prófinu er ætlað að mæla orðaforða barnanna svo og hvort þau hafa náð valdi á beygingarkerfi og setningagerð málsins. Aldursviðmið fylgja prófinu, en með samanburði við þau er skorið úr um hvort málþroski barna mælist innan eðlilegra marka miðað við jafnaldra. Höfundur prófsins er Elín Þöll Þórðardóttir.

Íslenski þroskalistinn

Listinn er ætlaður fyrir þriggja til sex ára börn. Mæður barnanna svara listanum og meta getu þeirra á mál-og hreyfisviði. Prófþættir eru: Málþáttur (hlustun, tal og nám), hreyfiþáttur (grófhreyfingar, skynhreyfingar og sjálfsbjörg). Til samans mynda undirprófin sex eina þroskatölu, sem gefur til kynna almennan þroska barnsins að mati móður. Höfundar prófsins eru Einar Guðmundsson og Sigurður J. Grétarsson.

Íslenski smábarnalistinn

Listinn er frumsaminn og staðlaður þroskalisti til að meta málþroska, hreyfiþroska og sjálfsbjörg ungbarna á aldrinum 15 til 38 mánaða. Hann er sjálfstætt framhald af Íslenska þroskalistanum. Höfundar prófsins eru Einar Guðmundsson og Sigurður J. Grétarsson.

Leið til læsis - Hljóðfærni

Hljóðfærni er staðlað greiningarpróf sem kannar hljóðkerfisvitund barna í 1. bekk grunnskóla með nákvæmum hætti. Prófið er aðallega ætlað börnum sem teljast í áhættuhópi vegna lestrarörðugleika/umskráningarörðugleika. Höfundar prófsins eru Bjartey Sigurðardóttir og Sigurgrímur Skúlason, en það er gefið út af Námsmatsstofnun 2012. Nánari upplýsingar er að finna á vef Námsmatsstofnunar undir tenglinum Skólatengd færni á vefslóðinni http://www.namsmat.is/vefur/stodlud_prof/leid_las/hljodfarni.html

Hljóm- 2 Einstaklingspróf

Hljóm – 2 er ætlað að til að athuga hljóð og málvitund barna á leikskólaaldri, 4-6 ára. Höfundar prófsins eru Ingibjörg Símonardóttir, Jóhanna Einarsdóttir og Amalía Björnsdóttir og var það gefið út árið 2002.

Prófþættir þess eru:

Rím, að finna hvaða orð á mynd rímar við gefið orð
Samstöfur, að klappa takt orða
Samsett orð, að finna hvaða orð verður til úr tveimur orðum
Hljóðgreining, að greina hvort tiltekið hljóð er í orði
Margræð orð, að finna tvær myndir af sama orði
Orðhlutaeyðing, að finna hvaða orð verður eftir ef hluti þess er numinn á brott
Hljóðtenging, að finna orð sem er hljóðað hægt
Greiningarpróf- einstaklingspróf:

Told -2P málþroskapróf

Málþroskapróf eru oft notuð með lestrargreiningarprófum til að athuga hvort um víðtækari málþroskaerfiðleika er að ræða en þá sem snúa að hljóðkerfisúrvinnslunni.

Told – 2P málþroskaprófi er ætlað að greina málþroskahæfni barna á aldrinum 4-9 ára. Prófið er eftir Hammill og Newcomer (1982, 1988). Ingibjörg Símonardóttir og Einar Guðmundsson sáu um þýðingu og staðfærslu og kom prófið út 1996.
Prófþættir (undirþættir) þess eru:

Orðþekking út frá myndum
Orðskilningur
Túlkun setninga
Endurtekning setninga
Hljóðgreining
Framburður

Told -2I málþroskapróf

Told – 2I málþroskaprófi er ætlað að greina málþroskahæfni barna á aldrinum 8-13 ára. Prófið er eftir Hammill og Newcomer (1982, 1988). Ingibjörg Símonardóttir og Einar Guðmundsson sáu um þýðingu og staðfærslu og kom prófið út 1996.
Prófþættir (undirþættir) þess eru:

Setningatenging
Orðaforði
Orðaröð
Alhæfingar
Málfræðiþekking
Orðabrengl

LOGOS

LOGOS er tölvuforrit/próf til að greina lesblindu (dyslexíu) og aðra lestrarerfiðleika hjá börnum, unglingum og fullorðnum. Bjarnfríður Jónsdóttir, Guðbjörg Ingimundardóttir, Guðlaug Snorradóttir og Gyða M. Arnmundsdóttir keyptu einkarétt á LOGOS á Íslandi og hafa þýtt, staðlað og staðfært það í samstarfi við lestrarsérfræðinginn prófessor Torleiv Høien frá Noregi.

Fyrsti hluti prófsins er ætlaður nemendum í 3. – 5. bekk, en hægt er að nota ákveðna prófhluta fyrir nemendur í 2. bekk í þeim tilgangi að greina lestrarerfiðleika barna eins fljótt og unnt er. Sá hluti er í 17 prófþáttum og lögð er áhersla á snemmtæka íhlutun og kennslufræðileg úrræði hvað varðar lestrarnám barna.
Annar hluti prófsins er ætlaður nemendum í 6. – 10. bekk og fullorðnum. Sá hluti er í 14 prófþáttum sem greina leshraða, lesskilning, hlustunarskilning, umkóðun og aðra lestrartengda færni. Flestir prófþættir eru metnir með tilliti til áreiðanleika og viðbragðsflýtis.
Prófin eru stöðluð út frá aldurssvarandi viðmiðun.

Hægt er að velja eftirfarandi form á niðurstöðum:
a. stöðluð skýrsla,
b. sundurliðuð skýrsla
c. nánari útfærslur á vandanum

Sjá nánar um prófið: http://www.logos-test.is/UmLogos.htm

Greinandi lestrarpróf fyrir 10 ára nemendur (GRP-10)

Prófið er samið af hópi fimmtán sérkennara (Aldís Eiríksdóttir o.fl.) veturinn 1998-99. Prófin voru unnin á námskeiði undir stjórn Rannveigar Lund í Lestrarmiðstöð KHÍ. Við forprófun og viðmiðanagerð voru prófin lögð fyrir 105 nemendur sem valdir voru af handahófi úr árgangi 10 ára barna í 15 skólum á Stór-Reykjavíkursvæðinu, Keflavík, Akranesi og í Borgarfirði.

Prófþættir þess eru:

Raddlestur samfellds texta
Lestur orðleysa
Athugun á hljóðkerfisvitund
Stafsetning eftir upplestri

Aston Index-lestrargreiningarpróf

Prófið er ætlað nemendum á aldrinum 6-12 ára. Það er enskt, eftir Margaret J. Newton og Michael E. Thomas (1976), en þýtt og staðfært úr norsku af Félagi íslenskra sérkennara (Bjarnfríður Jónsdóttir o.fl.) og gefið út á Íslandi árið 1996.

Prófþættir þess eru:
Að þekkja myndir
Orðskýringar
Að teikna manneskju (Goodenaugh –teiknipróf)
Að teikna eftir fyrirmynd
Bókstafir og hljóð
Lestur stakra orða
Stafsetning stakra orða (má nota sem hóp-próf)
Sjónræn aðgreining
Hægri/vinstri áttun
Að skrifa nafnið sitt
Frjáls stíll
Sjónrænt raðminni á myndir og tákn
Heyrnrænt raðminni á talnaraðir
Hljóðtenging
Hljóðgreining
Mat á ríkjandi hönd (Grenitré)

Útgefið efni

You are here

Greiningarpróf